ಒಲ್ಲದ ಅಳಿಯ … (ಉತ್ತರ ಕನ್ನಡದ ಗಾದೆ – 45)

ಒಲ್ಲದ ಅಳಿಯ ಒರಳು ಕಲ್ಲು ನೆಕ್ಕಿದ್ದನಂತೆ.

ಇದರ ಬಗ್ಗೆ ಒಂದು ಕಥೆಯೇ ಇದೆ. ಅಳಿಯ ಮಾವನ ಮನೆಗೆ ಬಂದಾಗ ಅತ್ತೆ ಹೋಳಿಗೆ ಮಾಡಿದ್ದಳು.
ಊಟಕ್ಕೆ ಕುಳಿತಾಗ ಹೋಳಿಗೆ ಬಡಿಸಲು ಹೋದರೆ ದಾಕ್ಷಿಣ್ಯ ಮಾಡಿಕೊಂಡ ಅಳಿಯ ಒಂದು ಹೋಳಿಗೆಯನ್ನೂ ತಿನ್ನಲಿಲ್ಲ.
ಎಲ್ಲರೂ ಮಲಗಿದರು. ಕೆಲಸ ಮಾಡಿ ಸುಸ್ತಾಗಿದ್ದ ಅತ್ತೆ ಹೋಳಿಗೆಯ ಹೂರಣವನ್ನು ರುಬ್ಬಿದ್ಡ ಒರಳು ಕಲ್ಲನ್ನು ತೊಳೆಯದೇ ಮಲಗಿದ್ದಳು. ಅಳಿಯನಿಗೆ ಹೋಳಿಗೆ ತಿನ್ನಬೇಕೆಂದು ಆಸೆ. ಎಲ್ಲರೂ ಮಲಗಿದ್ದಾಗ ಸದ್ದು ಮಾಡದೇ ಎದ್ದು ಹೋಗಿ ಒರಳು ಕಲ್ಲನ್ನು ನೆಕ್ಕಿದ್ದನಂತೆ!

ಯಾವುದಾದರೂ ವಸ್ತು ಮನಸ್ಸಿಗೆ ಬೇಕು ಎನಿಸಿದರೂ ದಾಕ್ಷಿಣ್ಯಕ್ಕೆಂದು ಬೇಡ ಎಂದು ನಂತರ ಆಸೆಯನ್ನು ತಡೆಯಲಾರದೇ ಅದನ್ನು ತೆಗೆದುಕೊಂಡರೆ ಈ ಗಾದೆಯನ್ನು ಹೇಳುತ್ತಾರೆ.