ಹೋದರೆ ಒಂದು ಕಲ್ಲು… (ಉತ್ತರ ಕನ್ನಡದ ಗಾದೆ – 118)

ಹೋದರೆ ಒಂದು ಕಲ್ಲು, ಬಿದ್ದರೆ ಮೂರು ಹಣ್ಣು.

ಒಂದು ಕಲ್ಲನ್ನು ಎಸೆಯುವುದು. ಒಂದು ವೇಳೆ ಗುರಿ ತಾಗಿದರೆ, ಅದೃಷ್ಟವಿದ್ದರೆ ಮೂರು ಹಣ್ಣು ಬಿದ್ದರೂ ಬೀಳಬಹುದು. ಇಲ್ಲವಾದಲ್ಲಿ ಕಳೆದುಕೊಳ್ಳುವುದು ಏನೂ ಇಲ್ಲ, ಒಂದು ಕಲ್ಲು ತಾನೇ.

ಯಾವುದೋ ಒಂದು ಕೆಲಸಕ್ಕಾಗಿ ಅಥವಾ ವಸ್ತುವಿಗಾಗಿ ಇನ್ನೊಬ್ಬರನ್ನು ಕೇಳುವ ಅವಕಾಶವಿದ್ದರೆ ಕೇಳುವುದು. ಅದು ಒಂದು ಪ್ರಯತ್ನವಷ್ಟೇ. ಸಿಕ್ಕಿದರೆ ಅದೇ ಲಾಭ; ಇಲ್ಲವಾದಲ್ಲಿ ಕಳೆದುಕೊಳ್ಳುವುದು ಏನೂ ಇಲ್ಲ ಎಂಬ ಸಂದರ್ಭದಲ್ಲಿ ಉಪಯೋಗಿಸಿ.