ಹೆಣ ಸುಡುವ ಬೆಂಕಿಯಲ್ಲಿ … (ಉತ್ತರ ಕನ್ನಡದ ಗಾದೆ – 115 ಮತ್ತು 116)

ಹೆಣ ಸುಡುವ ಬೆಂಕಿಯಲ್ಲಿ ಬೀಡಿ ಹೊತ್ತಿಸಿಕೊಳ್ಳುವವನು.

ಸುಮ್ಮನೇ ಏಕೆ ಒಂದು ಕಡ್ಡಿ ಗೀರಿ ಖರ್ಚು ಮಾಡಲಿ ಎಂದು ಅವನು ಹೆಣ ಸುಡುತ್ತಿರುವ ಬೆಂಕಿಯಲ್ಲೇ ಬೀಡಿಯನ್ನು ಹೊತ್ತಿಸಿಕೊಳ್ಳುತ್ತಾನೆ. ಹೆಣ ಸುಡುತ್ತಿರುವ ಬೆಂಕಿ ಎಂಬ ಭಾವನೆಯೂ ಕೂಡ ಅವನನ್ನು ಬಾಧಿಸುವುದಿಲ್ಲ. ತಮ್ಮ ಜಿಪುಣತನದಲ್ಲಿ ಭಾವನೆಗಳಿಗೂ ಕೂಡ ಬೆಲೆ ಕೊಡದವರು ಇವರು. ಅಂತಹ ಜಿಪುಣರನ್ನು ಕುರಿತು ಈ ಗಾದೆಯನ್ನು ಹೇಳಿ.

ಇನ್ನೂ ಸ್ವಲ್ಪ ಕಡಿಮೆ ಜಿಪುಣತನವನ್ನು ತೋರಿಸುವ ಕೆಲವರಿರುತ್ತಾರೆ. ಅಂಥವರನ್ನು ಕುರಿತು ಎಂಜಲು ಕೈಯ್ಯಲ್ಲಿ ಕಾಗೆಯನ್ನೂ ಓಡಿಸದವರು ಎಂದು ಹೇಳಬಹುದು. ಏಕೆಂದರೆ ಕಾಗೆಗೆ ಎಲ್ಲಿಯಾದರೂ ಒಂದೆರಡು ಅಗುಳು ಅನ್ನ ಸಿಕ್ಕಿಬಿಟ್ಟೀತೆಂಬ ಜಿಪುಣತನದಿಂದ.