ಅಗುಳು ಬರುತ್ತದೆ … (ಉತ್ತರ ಕನ್ನಡದ ಗಾದೆ – 149)

ಅಗುಳು ಬರುತ್ತದೆ ಎಂದು ತಿಳಿ ಕುಡಿದಂತೆ.

ಅನ್ನದ ನೀರನ್ನು ಬಸಿದಾಗ ಆ ತಿಳಿಯ ಜೊತೆ ಕೆಲವೊಂದು ಅಗುಳೂ ಸಹ ಬಿದ್ದಿರುತ್ತದೆ. ಹಾಗೆ ಬಿದ್ದ ಅನ್ನದ ಅಗುಳುಗಳು ತಳದಲ್ಲಿ ಸೇರಿಕೊಂಡಿರುತ್ತವೆ. ಅಗುಳನ್ನು ಪಡೆಯುವ ಆಸೆಯಿಂದ ತಿಳಿಯನ್ನು ಕುಡಿಯಬೇಕಾಗುತ್ತದೆ. ಕೆಲವೊಮ್ಮೆ ಅಗುಳುಗಳು ಬಿದ್ದಿರದ ಸಾಧ್ಯತೆಯೂ ಉಂಟು! ಯಾವುದೋ ಒಂದು ಕೆಲಸದಿಂದ ಸಿಗುವ ಫಲ ಅನಿಶ್ಚಿತವಾಗಿದ್ದಾಗಲೂ ಕೂಡ ಫಲ ಸಿಗುತ್ತದೆ ಎಂಬ ಆಸೆಯಿಂದ ಆ ಕೆಲಸದಲ್ಲಿ ಬರುವ ಕಷ್ಟಗಳನ್ನೆಲ್ಲಾ ಮೈಮೇಲೆ ಹಾಕಿಕೊಳ್ಳುತ್ತಿರುವವರ ಬಗೆಗಿನ ಮಾತು ಇದು.